ព័ត៌មាន សសក

ភ្នំពេញ — ឧស្សាហកម្ម ស្វាយចន្ទី បន្តដើរតួនាទីយ៉ាងសំខាន់នៅក្នុងកំណើនសេដ្ឋកិច្ចជនបទរបស់កម្ពុជា ដោយផ្តល់ការងារ និងប្រាក់ចំណូលដល់កសិករខ្នាតតូចរាប់ពាន់នាក់នៅទូទាំងប្រទេស។ តាមរយៈកិច្ចសហការបន្តរវាងក្រុមហ៊ុនផ្គត់ផ្គង់ធាតុចូលកសិកម្ម និង សមាគមស្វាយចន្ទីកម្ពុជា (សសក) កម្ពុជាមានគោលបំណងបង្កើនសមត្ថភាពកែច្នៃ ពង្រីកការចូលទៅកាន់ទីផ្សារ និងពង្រឹងកេរ្តិ៍ឈ្មោះរបស់ខ្លួនជាអ្នកផ្គត់ផ្គង់គ្រាប់ស្វាយចន្ទីដែលមានគុណភាពខ្ពស់ និងផលិតដោយនិរន្តរភាពប្រកបដោយភាពជឿជាក់។

យោងតាមទិន្នន័យក្រៅផ្លូវការ កម្ពុជាទទួលបានចំណូលប្រហែល ១.៤ ពាន់លានដុល្លារ ពីការនាំចេញគ្រាប់ស្វាយចន្ទីឆៅក្នុងរយៈពេលប្រាំបីខែចុងក្រោយដែលបញ្ជាក់ពីការរួមចំណែករបស់ដំណាំនេះចំពោះសេដ្ឋកិច្ចជាតិ។ ដើមស្វាយចន្ទីមានលក្ខណៈសមស្របជាពិសេសសម្រាប់ដីអន់ដែលមិនលិចទឹកក្នុងរដូវវស្សានៅកម្ពុជា ដែលធ្វើឱ្យវាជាជម្រើសដ៏សំខាន់សម្រាប់ជីវភាពរស់នៅរបស់សហគមន៍ជនបទ។ សសក បានណែនាំកសិករមិនឱ្យដាំស្វាយចន្ទីនៅលើដីមានជីជាតិ និងមានគុណភាពល្អឡើយ ដោយទុកដីល្អៗសម្រាប់ប្រើប្រាស់កសិកម្មផ្សេងទៀត។

ទោះបីជា សសក ជាស្ថាប័នក្រៅរដ្ឋាភិបាលតូចមួយដែលមានធនធានមានកម្រិតក៏ដោយ ក៏ សសក បានដើរតួនាទីយ៉ាងសំខាន់ក្នុងការគាំទ្រកសិករតាមរយៈការកែលម្អបច្ចេកទេសដាំដុះ ការជួញដូរគ្រាប់ឆៅ និងគំនិតផ្តួចផ្តើមក្នុងការកែច្នៃ។ សសក ក៏បានខិតខំទាក់ទាញវិនិយោគិនបរទេសតាមរយៈការចូលរួមក្នុងបេសកកម្មពាណិជ្ជកម្ម និងពិព័រណ៍អន្តរជាតិនានា ដើម្បីបង្ហាញសក្តានុពលស្វាយចន្ទីរបស់កម្ពុជា។

ក្នុងជំហានដ៏សំខាន់ទៅមុខមួយទៀត ក្រសួងកសិកម្ម រុក្ខាប្រមាញ់ និងនេសាទ  តាមរយៈ នាយកដ្ឋានកសិ-ឧស្សាហកម្ម បានដាក់ឱ្យដំណើរការវគ្គបណ្តុះបណ្តាលថ្មីស្តីពី បច្ចេកទេសក្រោយពេលប្រមូលផល និងការកែច្នៃគ្រាប់ស្វាយចន្ទី។ កម្មវិធីនេះដឹកនាំដោយក្រុមការងារបច្ចេកទេស នាយកដ្ឋានកសិ-ឧស្សាហកម្ម មានគោលបំណងពង្រឹងសមត្ថភាពមន្ត្រីមន្ទីរកសិកម្មមូលដ្ឋាន។

វគ្គបណ្តុះបណ្តាលនេះផ្តោតសំខាន់លើទាំងទ្រឹស្តី និងការអនុវត្តផ្ទាល់ទៅលើ ការគ្រប់គ្រងក្រោយពេលប្រមូលផល ស្តង់ដារ និងការត្រួតពិនិត្យគុណភាពគ្រាប់ស្វាយចន្ទី វិធីសាស្ត្រកែច្នៃ និង ការអនុវត្តអនាម័យល្អ។ បន្ទាប់ពីទទួលបានការបណ្តុះបណ្តាល មន្ត្រីកសិកម្មឃុំនឹងបន្តពាំនាំចំណេះដឹង និងជំនាញរបស់ពួកគេទៅបង្រៀនកសិករ ដែលនឹងជួយកែលម្អស្តង់ដារផលិតកម្ម និងបង្កើនតម្លៃនៃការនាំចេញស្វាយចន្ទីរបស់កម្ពុជា។

សសក បានសម្តែងការអបអរសាទរចំពោះការគាំទ្ររបស់រដ្ឋាភិបាលដែលកំពុងកើនឡើងចំពោះវិស័យនេះ ដោយសង្កត់ធ្ងន់ថា ភាពជាដៃគូបែបនេះគឺជាគន្លឹះដើម្បីធានាបាននូវកំណើនប្រកបដោយនិរន្តរភាព និងការកែលម្អជីវភាពរស់នៅសម្រាប់សហគមន៍ជនបទរបស់កម្ពុជា៕