ព័ត៌មាន សសក

កំពង់ធំ ថ្ងៃទី៤ មិថុនា៖ ថ្នាក់ដឹកនាំក្នុងឧស្សហកម្មកែច្នៃចន្ទីបានលើកឡើងថា ការកើនឡើងនូវការប្រើប្រាស់ខ្សែច្រវាក់កែច្នៃដោយប្រព័ន្ធស្វ័យប្រវត្តិកំពុងផ្លាស់ប្តូរស្តង់ដារសុវត្ថិភាពនៅក្នុងវិស័យស្វាយចន្ទី តាមរយៈការកាត់បន្ថយយ៉ាងខ្លាំងនូវការប៉ះពាល់ផ្ទាល់របស់កម្មករទៅនឹងប្រេងសំបកស្វាយចន្ទី (CNSL) ដែលជាសារធាតុ មកពីធម្មជាតិដែលអាចបង្កឱ្យមានការរលាកស្បែក និងហានិភ័យសុខភាពផ្សេងៗទៀត។

នៅក្រោមប្រតិបត្តិការប្រព័ន្ធមេកានិចពេញលេញ គ្រាប់ស្វាយចន្ទីឆៅនឹងត្រូវផ្លាស់ទីកាត់តាមបន្ទប់ស្ងោរបិទជិត និងប្រព័ន្ធបកសំបកស្វ័យប្រវត្តិ ដែលសំបកនឹងត្រូវបំបែក និងញែកចេញដោយគ្មានការប៉ះពាល់ដោយដៃផ្ទាល់ពីមនុស្សឡើយ។ ជាលទ្ធផល កម្មកររោងចក្រកំពុងងាកទៅដើរតួនាទីលើផ្នែកត្រួតពិនិត្យ បច្ចេកទេស និងការគ្រប់គ្រងគុណភាពកាន់តែច្រើនឡើង ជំនួសឱ្យការធ្វើការងារបកសំបកដោយដៃ។

លោក អួន ស៊ីឡុត ប្រធានសមាគមស្វាយចន្ទីកម្ពុជា (សសក) បានមានប្រសាសន៍ថា៖ «យើងកំពុងមើលឃើញថា ប្រព័ន្ធស្វ័យប្រវត្តិ មិនត្រឹមតែជួយលើកកម្ពស់សុវត្ថិភាពនៅកន្លែងធ្វើការប៉ុណ្ណោះទេ ប៉ុន្តែថែមទាំងជួយបង្កើនប្រសិទ្ធភាពនៃការកែច្នៃផងដែរ»។

លោក អួន ស៊ីឡុត បានកត់សម្គាល់ថា ឧស្សាហកម្មនេះក៏កំពុងស្វែងរកឱកាសថ្មីៗ ដើម្បីបង្កើនតម្លៃនៃអនុផលស្វាយចន្ទី ព្រមទាំងកាត់បន្ថយថ្លៃដើមផលិតកម្មសរុបផងដែរ។ ជាផ្នែកមួយនៃកិច្ចខិតខំប្រឹងប្រែងទាំងនេះ កម្ពុជាត្រូវបានរំពឹងថានឹងបង្កើតរោងចក្រចម្រាញ់ប្រេង CNSL ខ្នាតមធ្យមចំនួនមួយ រួមជាមួយរោងចក្រខ្នាតតូចចំនួនពីរនាចុងឆ្នាំ ២០២៦ ខាងមុខ។

រោងចក្រខ្នាតតូចនឹងប្រើប្រាស់បច្ចេកវិទ្យាចម្រាញ់របស់ជប៉ុន ដែលមានសមត្ថភាពកែច្នៃប្រេង CNSL ដោយប្រើប្រាស់ត្រឹមតែ ២ ដំណាក់កាលប៉ុណ្ណោះ ខណៈដែលរោងចក្រខ្នាតធំត្រូវបានរំពឹងថានឹងអនុវត្តបច្ចេកវិទ្យារបស់វៀតណាម ដែលទាមទារដំណើរការចម្រាញ់រហូតដល់ ៥ ដំណាក់កាល។

ភាគីពាក់ព័ន្ធក្នុងឧស្សាហកម្មជឿជាក់ថា ការវិនិយោគទាំងនេះនឹងពង្រឹងខ្សែច្រវាក់តម្លៃស្វាយចន្ទីរបស់កម្ពុជា លើកកម្ពស់សមត្ថភាពប្រកួតប្រជែង និងបង្កើតប្រភពចំណូលថ្មីៗពីអនុផលដែលកន្លងមកមិនសូវត្រូវបានយកមកប្រើប្រាស់ឱ្យអស់សក្តានុពល។

💡ព័ត៌មានបន្ថែម៖

• CNSL (Cashew Nut Shell Liquid): ភាសាបច្ចេកទេសផ្លូវការហៅថា  "ប្រេងសំបកស្វាយចន្ទី" ដែលជាប្រេងមានតម្លៃខ្ពស់ក្នុងវិស័យឧស្សាហកម្មអន្តរជាតិ (ប្រើសម្រាប់ធ្វើថ្នាំលាបកប៉ាល់ គ្រឿងជ័រ លាយជាមួយចំណីសត្វ និងគ្រឿងបន្លាស់យន្តហោះ)។
• ការវិវត្តឆ្នាំ ២០២៦៖ ការបង្កើតរោងចក្រចម្រាញ់ប្រេងទាំង ៣ នេះនៅចុងឆ្នាំ ២០២៦ នឹងជួយឱ្យកសិករ និងរោងចក្រខ្នាតតូចរបស់កម្ពុជា អាចលក់សំបកចន្ទីដែលសល់ពីការបកបានក្នុងតម្លៃសមរម្យ មិនបាច់ចោលទទេៗឡើយ។